2021 թվականից կգործի համապարփակ բժշկական ապահովագրության համակարգը: Առողջապահության նախարար Արսեն Թորոսյանն այսօր ֆեյսբուքյան ուղիղ եթերի ժամանակ մանրամասն ներկայացրեց՝ ինչպես է գործելու համակարգը:
Ըստ Թորոսյանի՝ ապահովագրական համակարգը կգործի երկու խմբերի մասով` այն քաղաքացիների, որոնք այս պահին պետության կողմից երաշխավորված բուժօգնություն են ստանում եւ զբաղված քաղաքցիների:
Նախարարը տեղեկացրեց նաեւ, որ բժշկական ապահովագրության թեմայով վարչապետ Նիկոլ Փաշինյանի հետ խորհրդակցություն է եղել:
«Դա առաջին խորհրդակցությունը չէր, երկրորդն էր այդ մակարդակի:
Հանրային քննարկումներ պետք է ծավալել այս հարցի վերաբերյալ, որպեսզի մշակմանը եւ ներդրմանը զուգընթաց բոլորը հասկական՝ ինչի՞ մասին է խոսքը:
Արսեն Թորոսյանը ներկայացրեց ՀՀ-ում համապարփակ բժշկական ապահովագրության համակարգի ներդրման նպատակները, սկզբունքներն ու առաջնահերթ քայլերը:
«Նպատակներից մեկը բնակչության համար բժշկական օգնության եւ սպասարկման որակի եւ մատչելիության բարձրացումն է: Ինչպես նաեւ՝ առողջապահության ոլորտի ֆինանսավորման նոր աղբյուների ներգրավվումը, ոլորտի ֆինանսավորման բարելավումը, բուժօգնության որակի վերահսկման նոր մեխանիզմների ներդրումը, Առողջապահության ոլորտի կառավարման արդյունավետության բարձրացումն ու ստվերային դրամաշրջանառության վերացումը»:
Սկզբունքների մասին խոսելով, նախարարը կարեւորեց առողջապահության ոլորտում սոցիալական համերաշխության եւ արդարության երաշխավորումը:
«Մենք ունենք տարբեր խմբերի քաղաքացիներ, առողջ քաղաքացիներ հարաբերականորեն, ավելի առողջական խնդիրներով քաղաքացիներ, երիտասարդ քաղաքացիներ, տարեց քաղաքացիներ, երեխաներ եւ նման համակարգերի ներդրումը կարեւոր է, քանի որ ընդգրկվում են բոլորը եւ պետք է հոգալ բոլորի կարիքներն՝ ըստ անհրաժեշտության:
Հիմա մենք ունենք փաստացի տարբեր փաթեթներ, որոնք հատվածական են լուծում խնդիրը: Մենք ուզում ենք լուծել բոլորի խնդիրները»,-ասաց Արսեն Թորոսյանը:
Այս թեմայով նախարարը պարբերաբար կխոսի, կլինեն դեբատներ, հեռուստատեսային քննարկումներ, պետք է նաեւ ԱԺ լսումներ կազմակերպել:
0 Մեկնաբանություն