ՀՀ Հարկային օրենսգրքում լրաջագույն փոփոխություններ են կատարվելու, իջեցվելու է եկամտահարկը: Ֆեյսբուքյան ուղիղ եթերի ժամանակ այսօր ասել է ՀՀ վարչապետ Նիկոլ Փաշինյանը.
«Հարկային օրենսգրքի պարզեցման ենք գնալու, որոշակիորեն իջվելու է նաև երկամտահարկը»,- ասաց վարչապետը:
Վարչապետի խոսքով` անհրաժեշտ է լուրջ փոփոխություններ կատարել նաև հանրային կառավարման ոլորտում:
«Ըստ էության մեր հանրային կառավարման համակարգն ուռճացված է ու ոչ էֆեկտիվ, մեր պետական կառավարման համակարգը դանդաղաշարժ է, ու երբեմն այդ դանդաղաշարժությունն այն աստիճանի է հասնում, որ շարժումը դառնում է անիմաստ: Նույնիսկ ես վարչապետս զգում եմ դա, պատկերացնում եմ քաղաքացին ինչպես կզգա», – ասաց վարչապետը:
Նա խոսեց տնտեսական առաջընթացի մասին կառավարության պատկերացումների մասին:
«Մեր տնտեսական լոկոմոտիվի դերում տեսնում ենք բարձր տեխնոլոգիական արդյունաբերությունը: Սա վերաբերվում է բարձր տեխնոլոգիական կոնկրետ արտադրանքին, ինչպես ընդունված է ասել, կոշտ արտադրանքին»: Վարչապետը հավաստիացրեց՝ Հայաստանում բարձր տեխնոլոգիական արտադրանքի արտադրություն կա արդեն:
Ըստ Նիկոլ Փաշինյանի՝ հետաքրքրություն կա ՀՀ-ում արևային էլեկտակայանների պանելներ թողարկելու, արտադրանք ստեղծելու վերաբերյալ: Ներդրումներ կան հեռուստացույցերի ու կենցաղային տեխնիկայի արտադրանքի թողարկում է ստեղծվելու:
Նիկոլ Փաշինյանը նշեց, որ մեր տնտեսությունը պետք է կառուցվի արտահանելու տրամաբանությամբ, քանի որ մեր շուկան շատ փոքր է: Այնուհետև նա օրինակ բերեց ադամանդագործությունը, ոսկերչությունը, թեթև արդյունաբերությունը: Հետո էլ կոչ արեց աջակցել տեղական արտադրողին. «Կոշիկ, հագուստ հագնելիս տեղականը լինի այնպիսի որակի ու գնի, որ հնարավորություն ունենանք դա օգտագործել: Նման հնարավորություն կա: Մեզ մոտ արտադրվող որակյալ կոշիկներ կան, հագուստի որոշակի տեսականի, որ ես հաճույքով օգտվում եմ: Ուրախ եմ, որ ես հանրահավաքին մի պիջակ էի հագել, հետո տեսա, որ գրում են, թե դա «Gucci»-ի կամ «Zilli»-ի է: Ուզում եմ ասել, որ դա Հայաստանում արտադրված պիջակ էր, ցավոք ոչ գործարանում, այլ մասնավոր դերձակի մոտ պատվիրված: Ուրախ եմ, որ նման տպավորություն է ստեղծվել, դա նշանակում է, որ ՀՀ-ում լուրջ պոտենցյալ կա այդ առումով»:
ՀՀ վարչապետ Նիկոլ Փաշինյանը ֆեյսբուքյան ուղիղ եթերի ժամանակ անդրադարձել է նաև իր նկարներով այս կամ այն ապրանքի արտադրությանը: Նա շեշտել է, որ ինքն ուրախ է, որ դա մարդկանց օգնում է՝ ավելի շատ եկամուտ ստանալու:
«Եթե իմ նկարը կամ անունը որևէ մեկին օգնում է, որ իր բիզնեսը մի քիչ ավելի առաջ գնա, ես ողջունում եմ: Եթե մի մարդ, որը մինչև այդ աղքատության նպաստի հույսին էր և իմ հեղափոխության պատկերով, անունով մի ապրանք է մտածել՝ բաժակ, շապիկ և այլն ու եկամուտ է ստանում, վաճառում է, և դա նրան քաջալերում, ոգևորում է աշխատել, ես ուրախ եմ ու համարում եմ շատ մեծ ծառայություն Հայաստանի ապագային և զարգացմանը», – ասել է Նիկոլ Փաշինյանը:
Վերջինս վստահեցրել է, որ այս առումով ինքը որևէ դիսկոմֆորտ չունի, քանի որ այսօրվա կառավարության հիմնական նպատակն աղքատության հաղթահարումն է:
0 Մեկնաբանություն