Վրաստանի նախկին նախագահ Միխեիլ Սաակաշվիլիին ձերբակալել են և կալանավորել։
Ինչպես հաղորդում է «Արմենպրես»-ը՝ վկայակոչելով «ՌԻԱ Նովոստի»-ն, այդ մասին հայտնել է երկրի վարչապետ Իրակլի Ղարիբաշվիլին։
«Մեր իրավապահների մոտ կար նախնական տեղեկություն իր տեղաշարժի մասին, սկսած Ուկրաինայից մինչև Վրաստան»,- ընդգծել է Ղարիբաշվիլին՝ չհստակեցնելով, թե որտեղ են բռնել նախկին նախագահին։
Ղարիբաշվիլին ընդգծել է, որ ուժայինները «ձերբակալման գործողությունն իրականացրել են բարձր մակարդակով»։ Վրացական ԶԼՄ-ների տվյալներով՝ Սաակաշվիլիին տեղափոխել են Թբիլիսիի կալանավայրերից մեկը։
Չնայած այս ամենին, նախկին նախագահի «Ֆեյսբուք»-ի էջն ակտիվ է և այնտեղ տեղադրվել է տեսանյութ, որը տեսագրվել էր նրա ձերբակալությունից առաջ։
«Ամենայն հավանականությամբ, ինձ շուտով կձերբակալեն Թբիլիսիում, բայց ցանկանում եմ ասել, որպեսզի ոչնչից չվախենաք, վաղը գնացեք ընտրություններին։ Տվեք ձեր ձայնը, և հոկտեմբերի 3-ին բոլորով կնշենք հաղթանակը։ Ես ժամանել եմ, որպեսզի օգնեմ ձեզ, այլընտրանք մեզ մոտ չկար։ Ես ոչնչից չեմ վախենում և կոչ եմ անում ձեզ էլ չվախենալ»,- ասել է Սաակաշվիլին։
Սաակաշվիլին ավելի վաղ հայտնել էր, որ նախատեսում է տեղի ընտրություններից առաջ վերադառնալ Վրաստան։
Վրաստանի նախկին նախագահ Միխեիլ Սահակաշվիլին իր ձերբակալման հիմքերն անօրինական ու կեղծված է անվանել: Ինչպես հաղորդում է «Արմենպրես»-ը, այս մասին հայտնում է «ՌԻԱ Նովոստի»-ն:
Սահակաշվիլիի նամակը Facebook-ի իր էջում հրապարակել էր նրա փաստաբանը:
«Իմ ազատությունը և որն ավելի կարևոր է՝ Վրաստանի ազատությունը կախված է ձեր ակտիվությունից: Դրանից է կախված նաև միջազգային աջակցությունը: Խնդրում եմ, չկասկածեք և մինչև վերջ հավատացած եղեք, որ մեր հաղթանակը ձեր ձեռքերում է»,- նշել էր Սահակաշվիլին՝ դիմելով ընտրություններին մասնակցող քաղաքացիներին:
Վրաստանում հոկտեմբերի 2-ին տեղական ինքնակառավարման մարմինների ընտրություններ են:
Հոկտեմբերի 1-ին Վրաստանի վարչապետ Իրակլի Ղարիբաշվիլին հայտնել էր, որ Սահակաշվիլին հայրենիքում ձերբակալված է: Իշխանությունները հայտնել էին, որ Սահակաշվիլին մտադիր է եղել երկրում հեղաշրջում իրականացնել:
Նախկին նախագահի փաստաբանը հայտնել է, որ իր պաշտպանյալը հացադուլ է հայտարարել:
0 Մեկնաբանություն