ՄԻՊ ֆինանսավորման կրճատումը կխաթարի կառույցի անկախությունը. Freedom House

Կառավարության նախաձեռնությունը կխաթարի Մարդու իրավունքների պաշտպանի անկախությունը և կխոչընդոտի մարդու իրավունքների պաշտպանության նրա գործունեությունը․Freedom House-ը հայտարարություն է տարածել

 Freedom House միջազգային իրավապաշտպան կազմակերպությունը 2021թ. մարտի 12-ին հայտարարություն է տարածել Հայաստանի մարդու իրավունքների պաշտպանի աշխատակազմի ֆինանսական անկախության երաշխիքի վերացման Կառավարության նախագծի վերաբերյալ։

 Մարդու իրավունքների պաշտպանի աշխատակազմը թարգմանել է անգլերեն հայտարարությունը, որի մեջ մասնավորապես ասվում է․ «Այս նոր օրինագիծը, եթե ընդունվի, կխաթարի Մարդու իրավունքների պաշտպանի անկախությունը և կխոչընդոտի Հայաստանում մարդու իրավունքները պաշտպանելու նրա մանդատին»։

 Ըստ կազմակերպության՝ Կառավարությունը փորձում է կրճատել ՀՀ մարդու իրավունքների պաշտպանի աշխատակազմի ֆինանսական անկախությունը: Այս մտահոգիչ զարգացումները միայն խորացնելու են Հայաստանի քաղաքական ճգնաժամը:

 Freedom House-ը հատուկ է շեշտել, որ Լեռնային Ղարաբաղի հակամարտության և ներկայում առկա քաղաքական ճգնաժամի լույսի ներքո առավել քան երբևէ կարևոր է պահպանել ՀՀ մարդու իրավունքների պաշտպանի աշխատակազմի և քաղաքացիական հասարակության կազմակերպությունների՝ հակամարտության ընթացքում տեղի ունեցած մարդու իրավունքների խախտումների, ինչպես նաև երկրում հիմնարար ազատությունների սահմանափակումների վերաբերյալ իրազեկելու կարողությունը։