ԱԱԾ-ից անհետացած փաստաթղթերի հարցով քրեական գործ չի հարուցվել: Այս մասին այսօր լրագրողների հետ զրույցում ասաց ԱԱԾ ղեկավար Արթուր Վանեցյանը:
«Քրեական գործ չի հարուցվել, որովհետեւ դա յուրահատկություններ պարունակող գործ է, որը պետք է ամբողջությամբ բացահայտվի, որպեսզի որեւէ կասկած որեւէ մեկի մոտ չմնա, որ մենք փորձել ենք կոծկել այդ փաստաթղթերի անհետացումը, կամ այդ փաստաթղթերի անհետացման հետ կապված ինչ-ինչ գործեր չեն բացահայտվի : Ուղղակի շատ մեծ ծավալի աշխատանք է տարվում ԱԱԾ տեսչական եւ ներքին անվտանգության վարչության կողմից, բայց կարծում եմ` առաջիկայում կավարտվի եւ կփոխանցվի քննչական մարմին, որը որ կորոշի գլխավոր դատախազը, եւ քննչական մարմինը հետագայում պարզաբանումներ կտա»,-ասաց Արթուր Վանեցյանը:
ԱԱԾ պետը չպատասխանեց՝ արդյո՞ք անհետացած փաստաթղթերում Մարտի մեկի գործին վերաբերող տեղեկություններ եղել են, թե ոչ, սակայն հավաստիացրեց, որ ինքն ամբողջությամբ տիրապետում է այդ փաստաթղթերի բովանդակությանը:
Արթուր Վանեցյանն, անդրադառնալով երեկ ՀՔԾ տարածած հաղորդագրությանը, նշեց, որ ԱԱԾ-ն եւ ՀՔԾ-ն միմյանց հետ համագործակցելով իրականացնում են ամեն ինչ, որպեսզի «Մարտի 1»-ի գործն ամբողջությամբ բացահայտեն:
0 Մեկնաբանություն