ՀՀ ազգային ժողովի «Լուսավոր Հայաստան» խմբակցությունն առաջարկում է համայնքային ոչ առևտրային կազմակերպությունների տնօրենի ընտրության համար նվազեցնել համայնքի ղեկավարի կողմից սուբյեկտիվ նշանակման հնարավորությունը, ավագանուն հնարավորություն տալ էական մասնակցություն ունենալ այդ հարցին: Տեղական ինքնակառավարման մասին օրենքում փոփոխություններ և լրացում կատարելու մասին օրենքի նախագիծը ԱԺ նիստում ներկայացրեց խմբակցության պատգամավոր Արմեն Եղիազարյանը:
«Գործող օրենքով համայնքային ոչ առևտրային կազմակերպությունների տնօրենները նշանակվում են բացառապես համայնքի ղեկավարի սուբյեկտիվ որոշման արդյունքում, ղեկավարը որոշում է թեկնածուին, ներկայացնում ավագանու հաստատմանը: Կա նաև մեկ աբսուրդային կետ, որով երկու անգամ մերժում ստանալու դեքում համայնքի ղեկավարը իրավասություն ունի միանձնյա որոշումով նշանակել: Սա խոչընդոտում է մարդկանց հավասար հնարավորություններն այդ պաշտոնում աշխատելու համար, երբեմն շահադիտական մեխանիզմներով լինում են ոչ նպատակահարմար նշանակումներ: Այս օրենքի փոփոխությամբ ուզում ենք լուծել այդ խնդիրը, բարձրացնել ավագանու դերը և ավելի պրոֆեսիոնալ մասնագետներ ներգրավել »,- ներկայացրեց Եղիազարյանը:
Համայնքային ոչ առևտրային կազմակերպությունների ղեկավարի թափուր պաշտոնի համար կանցկացվի մրցույթ, որի անցկացման կարգը կսահմանի կառավարությունը: Մրցույթի արդյունքում ընտրված թեկնածուի նշանակումը կհաստատի կամ կմերժի ավագանին:
Եղիազարյանը նախագծի առաջինից երկրորդ ընթերցմանն առաջարկելու է մրցույթի անցկացման կարգը հստակ սահմանել օրենքով:
0 Մեկնաբանություն