ՀՀ վարչապետ Նիկոլ Փաշինյանը վստահեցնում է՝ անկախ նրանից, թե ով է Թուրքիայի հետ կարգավորման գործընթացի հարցով Հայաստանի հատուկ ներկայացուցիչը, գործընթացի ամբողջ պատասխանատվությունը կրում է և կրելու է ինքը: «Արմենպրես»-ի հաղորդմամբ՝ Փաշինյանն այս մասին ասաց ԱԺ-ում կառավարության անդամների հետ հարցուպատասխանին՝ անդրադառնալով «Հայաստան» խմբակցության պատգամավոր Գեղամ Մանուկյանի հարցին, թե Թուրքիայի հետ կարգավորման գործընթացի համար Ռուբեն Ռուբինյանին հատուկ ներկայացուցիչ նշանակելու որոշումն ո՞վ է կայացրել և ինչի՞ հիման վրա:
«Ռուբեն Ռուբինյանին այդ կարգավիճակով օժտելու որոշումը ես եմ կայացրել, կայացրել եմ քաղաքական նպատակահարմարությունից ելնելով: Ռուբեն Ռուբինյանը հաշվետու է ինձ, Անվտանգության խորհրդին, նաև մեծ հաշվով` ժողովրդին»,-ասաց Փաշինյանը:
Մանուկյանը հետաքրքրվեց՝ կա արդյոք որևէ գրավոր փաստաթուղթ՝ մտահոգություն հայտնելով, որ, եթե հանկարծ Ռուբինյանն ինքը այդ բանակցություններում վտանգավոր համաձայնություն կայացնի, Նիկոլ Փաշինյանի ստորագրությամբ փաստաթուղթ չի լինելու:
Վարչապետը վստահեցրեց. «Անկախ նրանից, թե ով կլինի բանակցողի կարգավիճակում, պարզ է, որ պրոցեսի ամբողջ պատասխանատվությունը կրում եմ ես, ով ուզում է լինի: Ես Ռուբինյանին օժտել եմ նաև այդ լիազորություններով՝ հաշվի առնելով անհրաժեշտությունը, որ ես այնտեղ նրա գործողությունների ամբողջ պատասխանատվությունը պետք է կրեմ: Եվ ես այդպես վարվել եմ, որ հանկարծ, ենթադրենք, թաքնված գաղտնի կուսակցականի այդ կարգավիճակով չօժտեմ, որ պետությանը զեկուցելու փոխարեն գա և զեկուցի այլ երկրների ազդեցության գործակալներին: Ես եմ կրում պատասխանատվություն, լիազորել եմ և կրում եմ պատասխանատվությունը և կրելու եմ պատասխանատվությունը»:
0 Մեկնաբանություն