Քաղաքականություն

Տարոն Սիմոնյան. «Ընդդիմությունն այսօր փորձում է փոխզսպել եւ կառավարությանը եւ ԱԺ մեծամասնությանը»

ԱԺ «Լուսավոր Հայաստան» խմբակցության պատգամավոր Տարոն Սիմոնյանը «Օրբելի» կենտրոնում «Խորհրդարանական կառավարումը Հայաստանում» թեմայով քննարկման շրջանակներում խոսելով սուպերվարչապետական համակարգի առկայության մասին՝ ասաց. «Դեռ 13-14 թվականներին, երբ նախաձեռնվում էին սահմանադրական փոփոխությունները, ես փաստաբան-փորձագետ էի եւ միշտ բացասական երանգներով էի անդրադառնում առկա հնարավոր փոփոխություններին եւ կանխատեսում էի վտանգ: Որովհետեւ գործադիր իշխանության ձեռքում շատ էր կենտրոնանում իշխանություն: Ընդդիմությունն այսօր ոչ թե փորձում է փոխզսպել կառավարությանը, այլ փորձում է փոխզսպել եւ կառավարությանը, եւ ԱԺ մեծամասնությանը: Այսինքն, մենք ունենք մի իրավիճակ, երբ փոքրաթիվ ընդդիմությունը պայքարում է երկու իշխանության ճյուղերի փոխզսպման համար՝ եւ Ազգային ժողովի, եւ գործադիր իշխանության: Սա է հիմնական խնդիրը, որ այսօրվա պառլամենտական համակարգը առաջ է բերել: Իրականում, երբ որ մենք խնդիրները փորձում ենք լուծել, այնքան շատ ենք խորանում դրանց մեջ, որ մոռանում ենք պարզությունը, թե ինչի համար ենք հավաքվել: Շատ դեպքերում պետք է հետ գնանք արմատները հասկանալու համար՝ ինչի՞ էր պետք ընդհանրապես իշխանությունների տարանջատումը կամ պառլամենտական համակարգը կամ երրորդը: Գործադիր իշխանությանը փոխզսպելու միտքը հենց այնպես չէր ծագել: Հիմա այն համակարգը, որ ձեւավորել եւ լծակ ենք տվել պառլամենտին, փաստացի կիրառվում է միայն այն դեպքում, երբ որ գործադիր իշխանության կողմից թույլտվության է արժանանում: Մենք այս պարագայում իշխանությունների տարանջատման գոնե դասական համակարգին չենք հարում: Գուցե, հետագայում՝ երկու-երեք սերունդ ապրելով կարողանանք մեզանում յուրօրինակ մշակույթ ձեւավորել… բայց ամեն ինչ թողնել ապագային, կարծում եմ, սխալ է: Գոնե այն փորձը, որ կա անցյալից, կարելի է օգտագործել ու կարելի էր օգտագործել նույն սխալները չկրկնելու համար, ինչ կատարել են այլ ժողովուրդներ ու ազգեր»: 

 

0 Մեկնաբանություն

Թողեք Ձեր մեկնաբանությունը

Ձեր մեկնաբանությունը կավելացվի մեր մոդերատորների հաստատումից հետո *