Գագիկ Խաչատրյանը դեռևս չի ձերբակալվել․ Արթուր Վանեցյան (տեսանյութ)

Ազգային անվտանգության ծառայության տնօրեն Արթուր Վանեցյանը ԱԱԾ շենքի դիմաց լրագրողների հետ զրույցում ասաց, որ Գագիկ Խաչատրյանը դեռևս չի ձերբակալվել։

«Քննչական դեպարտամենտը գործողություններ է կատարում Խաչատրյանի տանը, բնակարանում, առանձնատանը»,- նշեց նա լրագրողների հետ զրույցում՝ հավելելով, որ խուզարկությունները դեռևս շարունակվում են։

Ապացույցների համակցության հիման վրա, ԱԱԾ պետի փոխանցմամբ, դեպարտամենտն առանձնապես խոշոր չափերի վատնման և պաշտոնեական դիրքի չարաշահման հատկանիշներով է գործ հարուցել։ Նա նաև չբացառեց, որ մեղադրանքը կլրացվի այլ հոդվածներով։ Ենթադրյալ հանցագործությունը, նրա խոսքով, կատարվել է պաշտոնավարման ընթացքում։

Արթուր Վանեցյանը նշեց այս գործով մեկ այլ մարդու անուն․ Կարեն Խաչատրյանը, որը Գագիկ Խաչատրյանի ազգականն է։ Խաչատրյանները բերման կենթարկվեն, մինչև օրվա ավարտը նրանց կարգավիճակը կորոշվի, և ԱԱԾ մամլո ծառայությունը հանդես կգա հայտարարությամբ։ Վանեցյանը նաև հավելեց, որ Խաչատրյանի որդիների վերաբերյալ որևէ բան չկա։

ԱԱԾ ղեկավարի վերջին տվյալներով՝ Խաչատրյանի Ծաղկաձորի տան խուզարկությունն ավարտին է մոտենում։

Հիշեցնենք, որ Գագիկ Խաչատրյանը 2008-14 թթ. Եղել կառավարությանն առընթեր պետական եկամուտների կոմիտեի նախագահը, իսկ 2014-18 թթ․ ֆինանսների նախարարը։

Տեսանյութը՝ Ֆակտորի