Կյանքից հեռացել է բանաստեղծ, հասարակական գործիչ Ռազմիկ Դավոյանը: Այս մասին տեղեկացրել է Հայաստանի գրողների միության նախագահ Էդվարդ Միլիտոնյանը:
Նրա խոսքով՝ բանաստեղծը մահացել է հունվարի 11-ին:
Ռազմիկ Դավոյանը ծնվել է 1940 թվականի հուլիսի 3-ին Սպիտակի շրջանի Մեծ Պարնի գյուղում: Տարրական կրթությունն ստացել է տեղի դպրոցում։ 1949-ին ընտանիքի հետ տեղափոխվել Գյումրի/Լենինական/, ուր ավարտել միջնակարգ դպրոցը և տեղի բժշկական ուսումնարանը: 1964-ին ավարտել է Երևանի Խ. Աբովյանի անվան Հայկական պետական մանկավարժական ինստիտուտի պատմալեզվագրական ֆակուլտետը: Ուսանելուն զուգընթաց աշխատել է «Գիտություն և տեխնիկա» ամսագրի հիմնադիր խմբագրությունում, զուգահեռ՝ նաև «Գրական թերթի» խմբագրությունում՝ որպես սրբագրիչ: 1965-ից վարել է «Գրական թերթի» պոեզիայի և արձակի բաժինը: 1989 թ.-ին նշանակվել է ՀՀ Գերագույն խորհրդի Աղետի գոտու հանձնաժողովի նախագահի առաջին տեղակալ։ 1991-1999 թթ. եղել է Համազգային հայ կրթական և մշակութային միության՝ Հայաստանի վարչության նախագահը։ 1994-1996 թթ. -ին ընտրվել է Հայաստանի Գրողների միության վարչության նախագահ: 1999-2003 թթ.-ին՝ ՀՀ նախագահի խորհրդական: 2005-2007 թթ.-ին՝ «Երևան» վավերագրական ֆիլմերի ստուդիայի տնօրեն: 2007-2018 թթ.-ին՝ «Հ1» հեռուստաալիքի տնօրենի խորհրդական: Առաջին բանաստեղծությունը տպագրվել է 1957 թ.-ին՝ Լենինականի «Բանվոր» թերթում, առաջին ժողովածուն՝ 1963-ին: Ավելի քան 40 ժողովածուի և գրքերի հեղինակ է, այդ թվում՝ ռուսերեն, չեխերեն և անգլերեն լեզուներով։ Նրա ստեղծագործությունները տպագրվել են իտալական, ֆրանսիական, հարավսլավական, իրանական, չինական և ամերիկյան պարբերականներում։ Ռազմիկ Դավոյանի կյանքին ու գործին անդրադարձել են «Լիտերատուրնայա Գազետա», ֆրանսիական «Ֆիգարո» բրիտանական «Թայմս» և «Ուասաֆիրի» պարբերականները։ 1969-ին՝ 5 տարի արգելափակվելուց հետո, հրատարակվում է «Ռեքվիեմը»։ 1972թ.-ին առաջին անգամ Բեյրութում հրատարակվում է «Խաչերի ջարդը» պոեմը, իսկ «Թորոս Ռոսլին» պոեմն առաջին անգամ հրատարակվում է Նյու Յորքում՝ 1984թ.-ին։ 1990 թ. չեխական հեղինակավոր «Օդեոն» հրատարակչությունը նրա ստեղծագործությունները ներառել է համաշխարհային գրականության անթոլոգիայում։
0 Մեկնաբանություն