Ինչպես այսօր տեղեկացրել էինք, վարչապետ Նիկոլ Փաշինյանն այցելել է Գյումրի՝ մասնակցելու երկրաշարժի անմեղ զոհերի հիշատակին նվիրված արարողությանը, որը տեղի է ունենում Սուրբ Ամենափրկիչ եկեղեցու բակում՝ հուշակոթողի մոտ:
Ուշագրավ էր, որ արարողակարգը այսօր չէր վարում Շիրակի թեմի առաջնորդ Միքայել սրբազանը, նրան փոխարինում էր մեկ այլ հոգևորական, ինչը ստիպեց մեզ՝ պարզել, թե ինչու է բացակայում Սրբազանը։ «Հրապարակը» կապվեց Շիրակի թեմի առաջնորդի հետ:
-Սրբազան, մեզ համար անսովոր էր Ձեր բացակայությունը, քանի որ երկար տարիներ շիրակցիները սովոր էին Ձեր գլխավորությամբ անմեղ զոհերի հոգեհանգստի կարգը մատուցելու արարողությանը։
-Ձեզ համար պարզ չէ՞ր, թե ինչու այնտեղ չէի․․․
-Այսինքն՝ երկրի առաջին դեմքի ներկայությու՞նն էր պատճառը։
— Այո, նա իմ վարչապետը չէ, որ ես նրա ներկայությամբ հոգեհանգստի կարգ մատուցեի։
Կարճ պատասխանից հետո սրբազանը հույս հայտնեց, որ մեր երկիրը գոնե շուտով կունենա այնպիսի ղեկավար, որն ի զորու կլինի երկիրը դուրս հանել այս ծանր կացությունից։ Ի դեպ, առավոտյան Յոթ վերք եկեղեցում ժողովրդի համար պատարագն անձամբ Սրբազանն է մատուցել:
0 Մեկնաբանություն