Սպորտ

Հայտնի են բոչիա հաշմադամային մարզաձևի 2018-ի բաց առաջնության հաղթողները:

Ծաղկաձորում ավարտվել է Հայաստանի  բոչիայի 2018 թվականի բաց առաջնությունը, որն անցկացվեց դեկտեմբերի  9- 13-ը: Կազմակերպիչը  «Լիարժեք կյանք» ՀԿ-ն էր՝ «Հաշմանդամային սպորտի հայկական ազգային ֆեդերացիայի» հետ համագործակցությամբ և ՀՀ Սպորտի և երիտասարդության նախարարության ֆինանսական աջակցությամբ՝ «Բոչիան հանուն հավասար հնարավորությունների և առողջ ապրելակերպի»  ծրագրի շրջանակներում:  Առաջնությանը մասնակցել են «Ձեզ համար», «Էմիլի արեգակ», «Լիարժեք կյանք», «Հայկական ճամբար», «Փյունիկ», «Հայաստանի մանուկներ հիմնադրամ» և «Երեխաների աջակցության հիմնադրամ», «Սկարպ» թիմերը՝ ՀՀ-ից,  «Ք. Քոկսի վերականգնողական կենտրոն» թիմը՝ Արցախից և «ПараПлан»  թիմը՝ ՌԴ Նիժնի Նովգորոդ  քաղաքից:  Առաջնության գլխավոր մրցավարն էր  Հաշմանդամային սպորտի հայկական ազգային ֆեդերացիայի նախագահ Սամվել Ռոստոմյանը: 

Թիմային  ու  անհատական մրցակարգերում լարված ու համառ պայքարի արդյունքում  գրանցվել են հետևյալ արդյունքները. թիմային մրցակարգում 3-րդ հորիզոնական՝ «Ք. Քոկսի վերականգնողական կենտրոն» թիմը՝ Արցախից/ ք. Ստեփանակերտ/, 2-րդ հորիզոնական՝  «Հայաստանի մանուկներ» հիմնադրամի թիմը՝ Արմավիր քաղաքից, 1-ին պատվավոր հորիզոնական՝ «Պարապլան» թիմը ՌԴ Նիժնի Նովգորոդ քաղաքից:

Անհատական մրցակարգի BC 1 դասակարգում 1-ին հորիզոնականում է հայտնվել Նարեկ Գասպարյանը /ք. Երևան/,  2-րդ հորիզոնականում՝ Արտյոմ Հովհաննիսյանը /ք. Գյումրի/, 3-րդ հորիզոնականում՝ Ալեքս Գրիգորյանը /ք. Վանաձոր/:

BC 2 դասակարգում 1-ին տեղում էր  Դմիտրի Ռազումկովը /ք.Նիժնի Նովգորոդ/,  2-րդ տեղում՝ Սարգիս Հակոբյանը /ք. Արմավիր/,  իսկ  3-րդ տեղում՝ Միքայել Պետրոսյանը /ք. Ստեփանակերտ/:  Իսկ ահա  BC 5 դասակարգում ձևավորվել է հետևյալ պատկերը՝ 1-ին տեղ՝     Սերյոժա Մելքոնյան /ք. Ստեփանավան/, 2-րդ տեղ՝ Մհեր Զալինյան /ք. Երևան/, 3-րդ տեղ՝   Նարեկ Հասրաթյան /ք. Երևան/

Համառոտ տեղեկություններ բոչիա մարզաձևի մասին

 1984 թվականի նյու- յորքյան  Պարալիմպիկ խաղերից հետո, բոչիան համարվում է պարալիմպիկ մարզաձև՝ նախատեսված ստորին և վերին վերջույթների կոորդինացիայի  խնդիր ունեցող անձանց համար: Խաղի արմատները գալիս են Հին Հունաստանից, որտեղ խաղացողները մեծ քարեր էին նետում դեպի թիրախ համարվող քարը: Բոչիա/ boccia/ անվանումը ծագում է լատիներեն “bottia” բառից, որ նշանակում է «գնդակ», եւ արտասանվում «բոտչա»: Ներկայում բոչիա խաղում են ավազով լցված գնդակներով` փորձելով գնդակները նետել թիրախ համարվող սպիտակ գնդակին , որքան հնարավոր է մոտ:  Հաղթողը որոշվում է թիրախին ավելի մոտ գցած գնդակների քանակով:

0 Մեկնաբանություն

Թողեք Ձեր մեկնաբանությունը

Ձեր մեկնաբանությունը կավելացվի մեր մոդերատորների հաստատումից հետո *