Խորեն Հովհաննիսյանը կպայքարի ՀՖՖ նախագահի թափուր պաշտոնի համար

Հայաստանի լեգենդար ֆուտբոլիստ Խորեն Հովհաննիսյանը կպայքարի Հայաստանի ֆուտբոլի ֆեդերացիայի նախագահի թափուր պաշտոնի համար։
«Ֆուտբոլի ֆեդերացիայից դեռ փաստաթուղթ չենք ստացել կապված նախագահական ընտրությունների հետ, չգիտենք ինչ կանոնակարգով է անցկացվելու այն։ Անկախ ամեն ինչից, ես դնելու եմ իմ թեկնածությունը ՀՖՖ նախագահի ընտրություններում։ Այժմ աշխատում ենք ֆուտբոլի զարգացման ծրագրի վրա», - «Ա1+»-ին ասել է Խորեն Հովհաննիսյանը, որը նորաստեղծ Երևանի «Անի» ֆուտբոլային ակումբի նախագահն է։ Ի դեպ, Հայաստանի ֆուտբոլի ֆեդերացիան (ՀՖՖ) քիչ առաջ նշել է, թե ինչ կարգով են ընտրվելու ֆեդերացիայի նախագահը և գործկոմը։ 
ՀՖՖ-ն մինչև դեկտեմբերի 23-ը պետք է ավարտի ՀՖՖ անդամ 34 ՀԿ-ների  զտման գործընթացը, որից հետո տեղի կունենա ՀՖՖ նախագահի և գործադիր կոմիտեի 16 անդամների ընտրությունը։
Գործադիր կոմիտեն ՀՖՖ քարտուղարության զեկույցների հիման վրա մոտակա նիստի ընթացքում կորոշի, թե որ ՀԿ-ների անդամակցությունն է կասեցվելու։ Մինչև դեկտեմբերի 2-ը ՀԿ-ները պետք է ներկայացնեն 1-ական թեկնածու գործկոմի անդամի և ՀՖՖ նախագահի պաշտոնի համար։
Հիշեցնենք՝ նոյեմբերի 21-ին ՀՖՖ նախագահ Արթուր Վանեցյանը ներկայացրեց հրաժարական։ Գործադիր կոմիտեի կազմը կլուծարվի դեկտեմբերի 23-ին։