Եթե գյուղի երիտասարդը զարգանա, գյուղը չի դատարկվի. Լիլիթ Սինդոյան

Լիլիթ Սինդոյանը «ԻնՍտեփանավան» զարգացման հիմնադրամի ծրագրերի պատասխանատուն է, ով ՔՀԿ ոլորտում փորձառու է, ունի բազում իրականացրած ծրագրեր մարզի տարբեր համայնքներում, բազում երիտասարդական նախաձեռնությունների հեղինակ է: Լիլիթը գնահատելով ՔՀԿ-ների գործունեությունը մարզերում, գտնում է, որ ՔՀԿ-ները ավելի շատ պետք է ներկայացված լինեն փոքր համայնքներում:

Պետության աջակցությունը ՔՀԿ-ներին

-Քաղաքացիական հասարակություն բոլոր այն կառույցները, ովքեր ուզում են աշխատել՝ չեն սպասում պետության աջակցությանը, իրենք են փնտրում աջակցություն տարբեր աղբյուրներից: Ազնիվ լինելու համար պիտի ասեմ, որ վերջին 2-3 տարիներին զգալի է պետության աջակցությունը քաղաքացիական հասարակական կազմակերպություններին: Բավականին շատացել են պետական, այդ թվում՝ ԿԳՄՍ, Զբոսաշրջության նախարարությունների կողմից տրամադրվող դրմաշնորհները: Պարզապես այստեղ հարց է առաջանում, արդյո՞ք ՔՀԿ-ները ցանկանում են այդ երկար, երբեմն արհեստական խոչընդոտներ ստեղծող ծրագրերին մասնակցել:

ՔՀԿ-ների անկախությունը

-Հայաստանի նման զարգացող երկրի համար ՔՀԿ-ների անկախությունը շատ հարաբարեկան է: Եթե հիմնական ռեսուրսները հայթհայթվում են դրսի դոնորի միջոցով, ապա կախվածությունը լինում է այնտեղ, թե ի՞նչ պահանջներ ունի դոնորը, իսկ եթե ներքին, ներհայաստանյան ոլորտում ենք դիտարկում՝ կախվածությունն այն է, թե ինչ պահանջներ ունի պետությունը: Սակայն բոլոր այն ՔՀԿ-ները, ովքե իրենց առաքելությամբ, իրենց տեսլականներով, նպատակներով ստեղծվել են ի օգուտ հասարակության՝ նրանք անկախ են: Եթե անկախության զգացողությունը չի լինում կամ արհեսատականորեն խոչընդոտվում է՝ կազմակերոպությունը դադարում է գործունեություն ծավալել կամ ելքեր է գտնում իր անկախությունը վերգտնելու համար: Իսկ եթե կազմակերպությունը ստեղծված է հանրության տարբեր շերտերի շահերիի պաշտպանության, ոտնահարված իրավունքի վերականգնման համար և անկախ չի գործում, ապա ձևական է նրա գործունեությունը:

ՔՀԿ-ների խնդիրները փոքր համայնքներում

-Եթե համեմատենք 2010-15 թվականների հետ, ապա կասեմ, որ այն ժամանակ քաղաքացիական հասարակության կառույցներ և նախաձեռնող խմբեր շատ չկային, հիմնականում մի քանի մեծ կազմակերպություններ էին գործում իրենց ծրագրերով: Հիմա, ի ուրախություն մեզ՝ կան բազմաթիվ կազմակերպություններ, որոնք ակտիվ են և այդ ակտիվությունը ձևական չէ, այսինքն չեն ստեղծվում ինչ-որ դրամաշնորհի շրջանակում, ծրագիր անում, փակվում ու գնում՝ իրենց տվյալները թողնում ինչ-որ գրքերում կամ ուղեցույցներում: Հիմա հեշտ է ՔՀԿ-ների աշխատանքը, բայց փոքր համայնքներում հեշտ է, թե դժվար՝ շատ հարաբերական է: Եթե համայնքի ղեկավարությունը, որոշումներ կայացնողները, համայնքի ակտիվ մասը, բիզնեսի ներկայացուցիչները, մտավորականները, ովքեր հետաքրքրված են համայնքի զարգացմամբ՝ միանշանակ նման համայնքում աշխատելը և հեշտ է, և համագործակցային է, և կառուցողական է, արդյունքն էլ ավելի լավ է լինում:

Կնոջ դերը ՔՀԿ-ների զարգացման գործում

-Ես վստահ եմ, որ Հայաստանում ՔՀԿ-ների զարգացման գործում մեծ նշանակություն ու դերակատարում ունեն կանայք: Եթե դիտարկենք ՔՀԿ-ներին, ովքեր ակտիվ են, աշխատում են հանուն հանրության, հանուն համայնքների զարգացման ու խնդիրների լուծման, նրանց մեծամասնությունը կանանց կողմից ստեղծված կամ կանանց կողմից ղեկավարվող է:

Մանրամասները՝ տեսանյութում

Սույն տեսանյութը ֆինանսավորվել է ԱՄՆ պետքարտուղարության Հանրային դիվանագիտության գրասենյակի դրամաշնորհի շրջանակներում: Այս հաղորդման մեջ  արտահայտված է հեղինակի դիրքորոշումը, որի համընկնումը ԱՄՆ պետքարտուղարության դիրքորոշման հետ պարտադիր չէ: