«Ավելի քան 30 հեկտար անտառ են հրդեհել ադրբեջանցիները՝ Տավուշի մարզի Արծվաբերդ համայնքի տարածքում՝ հայտնում է Yerkir.am-ը։
Արծվաբերդի բնակիչները պատմել են, որ զինվորական դիրքերի տեսախցիկները ֆիքսել են՝ ինչ է իրականում տեղի ունեցել․ ադրբեջանցիները սարի գագաթից՝ իրենց դիրքերից, ավտոմեքենաների անվադողեր են այրել և տարբեր ուղղություններով գլորել Հայաստանի սահմանից ներս՝ անտառի միջով դեպի գյուղի ջրամբարը, որը տեղացիները կոչում են «Ծիլի ծով», իսկ պաշտոնական անվանումը Խնձորուտի ջրամբար է։
Ամբողջ ծուխը տարածվել է գյուղով մեկ։ Ադրբեջանցիների գլորած անվադողերից անտառը վառվել է ու ծխեցնելով իջել ներքև։ Իրենք երևի տենց են անում, որ մարդիկ հավաքվեն, սկսեն հանգցնել կրակը, որ տեսնեն՝ հավաքված են, հրթիռ կամ արկ գցեն, սպանեն։ Բացի այդ, անտառներն օգնում են սահմանապահներին ու կամավորական ջոկատներին՝ ավելի արդյունավետ պահել սահմանը»,-ասաց տեղի բնակչուհի Աննա Մելքումյանը։
Որևէ մարդ այս պահին չի տուժել։ Գյուղացիները չեն բացառում, որ ադրբեջանցիները փորձում են վնասել նաև ջրամբարը, որը ջուր է մատակարարում է շրջակա գյուղերին։ Այդ անտառներում նաև մոտակա գյուղերի մեղվի փեթակներն են դրված։ Այս պահին ջրամբարն ու փեթակներն անվնաս են։
ՀՀ ՇՄՆ Անտառային կոմիտեի «Արծվաբերդի անտառտնտեսություն» մասնաճյուղի տնօրեն Նորայր Պապյանը Yerkir.am-ին ասել է, որ սահմանին հարակից մի հսկայական տարածք այրվել է՝ մի ողջ անտառպետություն։
«Հրշեջ մեքենաներ ընդհանրապես չեն կարողացել մոտենալ, ադրբեջանցիները այնտեղից կրակում են, ոտքով մի 20-30 կմ բարձրացել ենք, որ թաքնվելով հանգցնենք։ Խոտածածկը չոր է ամբողջությամբ, մինչև 40 սմ հաստությամբ չորացած տերևներ են թափված, դե պատկերացրեք՝ մի սիգարետից էլ կբռնկվեր անտառը, բայց վառած անվադողեր են գլորել։ Մեր աշխատակիցների մի մասն էլ կամավորագրված է, այնպես որ Արծվաբերդի բնակչությունն էլ միացավ մեզ, որ հանգցնենք, որովհետև անվտանգության հարց էլ կար, որ գյուղ չմտնի այդ ամբողջ կրակը»․-ասաց նորայր Պապյանը։
Զավեշտն այն է, որ ադրբեջանցիները այրել են անտառը հայկական կողմին վնաս տալու համար, բայց կրակը տարածվել է նաև դեպի ադրբեջանական կողմ՝ նրանց գյուղն էլ է այրվել, նրանց ժողովուրդն էլ է աղմուկ բարձրացրել։
Նորայր Պապյանն ասաց՝ հիմնականում չոր խաշամն է վառվել, կանգուն ծառերին գրեթե վնաս չի հասցվել, շուտ կանխել են։
Արծվաբերդցիներն ասում են՝ մի անհանգստացեք, ամուր կանգնած ենք, բոլոր դժվարություններին էլ արդեն սովոր են։ Բայց ադրբեջանցիների ձեռագիրը, որով Արցախում էլ անտառները այրում են անգամ ֆոսֆորային արգելված զինատեսակներով, լավատեսության տեղ չի թողնում:
0 Մեկնաբանություն