Լոռու մարզի Թումանյան համայնքը մնացել է առանց ավագանու. Ազատություն (տեսանյութ)

Լոռու մարզի Թումանյան խոշորացված համայնքն ավագանի չունի։ 9 անդամներից 6-ն անօգուտ է համարել իր աշխատանքն ու հրաժարականի դիմում գրել։

Տիգրան Մխիթարյանը, որ 2016-ին էր ընտրվել, դեռ մեկ տարի առաջ է հրաժարվել անդամությունից։ Ասում է, թե 25 տարվա համայնքապետ Լևոն Զավարյանի հետ անհնար էր լեզու գտնել հատկապես Թումանյան քաղաքին միացած 6 գյուղերի խնդիրները քննարկելիս։

Մխիթարյանը մատնանշում է, որ դեռ երկու տարի առաջ ավագանու կայացրած որոշումներն են թղթի վրա մնացել. – «Ինքը ընդհանրապես չէր ուզում, որ լսի համայնքի բնակիչի խնդիրների մասին, ինչ ա մնում մի հատ էլ խոսանք դրա լուծման մասին։ Իրա համար դա մեկ էր»:

Առանց վարձատրության աշխատող Թումանյանի ավագանին անցած տարի ընդամենը 7 նիստ է գումարել։ Ավագանու անդամությունից հրաժարված Մերուժան Խեչոյանը, ով 20 տարի շարունակ վերընտրվել է, ասում է՝ իրենց ավագանին արդեն դադարել էր գոյություն ունենալ. – «Պատկերացրեք իրավիճակ, երբ որ շատ խնդիր կա, քվորում չի ապահովվում: Երբ որ պետք ա զանգես ավագանու անդամին, խնդրես, որ ինքը գա, որ քվորում ապահովվի: Դե դա աշխատանք չի, դա լուրջ չի, և ես գտա, որ իմ հրաժարակով եթե օրինակի համար էն իրավիճակը ստեղծվի, որ նոր ընտրություններ տեղի ունենա և նոր ավագանի ընտրվի, երևի ավելի արդյունավետ կաշխատի, քան գործող ավագանին»:

Ավագանու լիազորությունները դադարեցրած անդամները շեշտում են, որ Թումանյանի բյուջեն կազմված է ոչ թե համայնքի զարգացման, այլ ընդամենը աշխատավարձ վճարելու համար։ Մինչև խոշորանալը Թումանյան քաղաքի բյուջեն 35 միլիոն դրամ էր։ 6 գյուղերի միանալուց հետո 5 անգամ մեծացել է։ Բայց ավագանու անդամությունից հրաժարված Մերուժան Խեչոյանը, ով նաև Թումանյանի դպրոցի զինղեկն է, ասում է՝ իրականացվող ծրագրերն ու բնակավայրերի զարգացման տեմպերն այդքանով չեն մեծացել. – «Ավագանու թիվ մեկ խնդիրը բյուջեն ա և նրա վերահսկումը: Եվ եթե նման բյուջե ա ներկայացվում ու ավագանին կողմ ա քվեարկում... չգիտեմ: Եթե բյուջեում նախատեսված չի համայնքի զարգացումը, նշանակում ա էդ բյուջեն հենց ընենք բյուջե ա»:

Համայնքի 24 տարվա ղեկավար Լևոն Զավարյանը որպես կորոնավիրուսով հիվանդի հետ կոնտակտավոր, ինքնամեկուսացած է։ Նրա տեղակալ Երվանդ Շաքարյանն «Ազատությանն» ասաց, որ այս պահին համայնքի բյուջեում մոտ 19 միլիոն դրամ ունեն, բայց ծախսելու հնարավորություն չունեն, քանի որ ավագանի չկա։ Համայնքի ղեկավարի տեղակալը հակադարձում է ավագանու արդեն նախկին անդամներին ու մեղադրում, թե ստեղծված իրավիճակի պատճառը նրանց անպատասխանատու վերաբերմունքն էր։ Կայացած հատուկենտ նիստերին ավագանու անդամներին իրար գլուխ հավաքել չէր լինում։ Շատ հաճախ քվորում չլինելու պատճառով նիստերը տապալվում էին, համայնքի համար կարևորագույն խնդիրների քննարկումը՝ հետաձգվում։

Մանրամասն՝ տեսանյութում: