Էդմոն Մարուքյան. «Առաջին անգամ Հայաստանի նոր իշխանությունն Արցախի հարցում հստակ ուղերձ հղեց»

ԵԱՀԿ Մինսկի խմբի համանախագահների հայտարարությունից հետո Արցախի հանրապետությունում Անվտանգության խորհրդի նիստ անցկացնելը ԱԺ «Լուսավոր Հայաստան» խմբակցության ղեկավար Էդմոն Մարուքյանը համարում է կարեւոր ուղերձ: Խորհրդարանում, լրագրողների հետ զրույցում, Էդմոն Մարուքյանն այդ նիստում վարչապետ Նիկոլ Փաշինյանի ելույթն այսպես գնահատեց. «Երեւի թե առաջին անգամ, Հայաստանի նոր իշխանությունն Արցախի հարցում հստակ ուղերձ հղեց»: Դրանք արտաքին օգտագործման ուղերձներ էին: Էդմոն Մարուքյանը կարեւորում է Նիկոլ Փաշինյանի ելույթի հետեւյալ շեշտադրումները` Արցախի իշխանության վերադարձը բանակցային սեղան, նաեւ այն, որ պետք է միջնորդները հստակություն մտցնեն բանակցային հիմք հանդիսացող սկզբունքների եւ տարրերի հետ: «Մինչեւ այսօր կարող է պարզ են եղել, մինչեւ այսօր բանակցողների համար, բայց նոր իշխանությունը նոր է սկսում բանակցությունը, առաջին հադիպումն է լինելու»,- ի պատասխան լրագրողների հարցերի`մինչեւ այսօր պարզ չէ՞ր, թե ինչի՞ շուրջ էին բանակցությունները, ասաց Էդմոն Մարուքյանը: Սպասվող Փաշինյան-Ալիեւ հանդիպումից Էդմոն Մարուքյանն առանձնակի մեծ արդյունքներ չի ակնկալում: Իսկ Արցախը`բանակցային սեղանի շուրջ վերադարձնելու համար, ըստ նրա, միջազգային հանրության հետ հայկական կողմը`դիվանագիտական եւ խորհրդարանական հարթակներում,  պետք է բանակցություններ տանի. «Չպետք է սպասել, որ Ալիեւը, ադրբեջանական կողմը ասի`դե լավ, որ ասում եք, թող գան բանակցեն: Այդպես չի լինելու: Քանի դեռ Յոհաննես Հաննից սկսած մինչեւ միջազգային հանրության այլ ներկայացուցիչներ չեն ասում`բայց կարծում եմ, որ Արցախը պետք է վերադառնա…»: Ըստ նրա, եթե բոլոր մայրաքաղաքներից այդ ուղերձը գա` Ադրբեջանն այլընտրանք չի ունենալու: Միաժամանակ, նկատում է, խնդրի վերջնական լուծումը պետք է բոլոր կողմերին բավարարի: 
Նյութը՝ «Առավոտ»-ի։