Լոռու մարզի Միխայլովկա գյուղի շուրջ 300 բնակիչներ նամակով դիմել են կառավարությանը՝ ցանկություն հայտնելով դուրս գալու Մեծավան խոշորացված համայնքի կազմից: Բոլոր հարցերը հստակեցնելու նպատակով գյուղում ժողով են հրավիրել: Կիսադատարկ դահլիճից համայնքի ղեկավար Սերյոժա Վարդանյանն ու տեղակալ Արուս Դումիկյանը դժգոհ են: Սերյոժա Վարդանյանի խոսքով՝ նման վերաբերմունքը գյուղի խնդիրների հանդեպ անընդունելի է: Խոշորացումից ի վեր Միխայլովկայում ավելի շատ աշխատանքներ են արվել Մեծավանի, քան իրենց հավաքագրումների հաշվին, –դժգոհում է Վարդանյանն ու հավելում՝ ինչպես դուք կնայեք պետությանը, այնպես էլ պետությունը ձեզ: Հիշեցնում է կառավարության որոշումը՝ հողամասերի ոչ նպատակային օգտագործման դեպքում դրանք ետ կվերցվեն գյուղացուց: Վարչական ղեկավար Դիլբարյանն առաջարկում է գյուղում կաթի վերամշակման կետ բացել, որը կլուծի այդ խնդիրը: Դիլբարյանը, ով նախկինում Միխայլովկայի գյուղապետն էր, ասում է, որ մինչ խոշորացումը իրենք առանձին բյուջեով կարողանում էին գյուղի հոգսերը հոգալ, հիմա կախվածության մեջ են Մեծավանից: Տեսնելով Նորաշեն համայնքի ըմբոստացումը՝ գյուղացիք դիմել են իրեն՝ խոշորացվածի կազմից դուրս գալու համար, ինքն էլ առաջարկել՝ ստորագրահավաք սկսել:Միխայլովկան Մեծավանի կազմում է 2017-ից՝ սահմանամերձ Պաղաղբյուր և Ձյունաշող գյուղերի հետ: Մարդիկ ասում են, որ իրենց կարծիքը ոչ ոք չի հարցրել: Խոշորացրել են ու վերջ: Ամեն քայլափոխի դժվարությունների են հանդիպում: Սեդա Յավրումյանը մինչ խոշորացումը գյուղի հաշվապահն էր: Նախկինում ասում է հարկերը լավ էին հավաքագրվում: Խոշորացումից հետո, անգամ եթե հարկեր են տալիս, չգիտեն Միխայլովկայի համար միասնական բյուջեից որքա՞ն գումար է ծախսվելու: Կա թերահավատություն կառավարման այս նոր մոդելի հանդեպ: Փոքր գյուղ են: Բյուջեի փշրանքներին են արժանանում:Գրեթե 30 տարի Մեծավանը կառավարող Սերյոժա Վարդանյանն առանձնապես ոգևորված չէ համայնքի կազմում Միխայլովկայի ներկայությամբ: Ասում է, որ Մեծավանը հարկերի հավաքման առումով միշտ չեմպիոնի կարգավիճակում է եղել, այժմ ստիպված է գլուխ կախել տարածքային կառավարիչների առջև: Փոխանակ աշխատելու, մարդիկ հույսը դրել են խոպանից եկող գումարների ու նպաստների վրա: Չեն ուզում անգամ իրենց տնամերձերը մշակել: Հավաքագրված հարկերն էլ հիմնականում ապահովում են մեծ հողօգտագործողները: Խոշորացման առաջին իսկ օրերից այստեղ աշխատանքներ տարվել են,-ասում է համայնքի ղեկավար Սերյոժա Վարդանյանը: Համայնքի բյուջեն 164 մլն դրամ է, որից 101 մլն-ը՝ պետությունից ստացվող դոտացիան: Հավանաբար գյուղում մեծամասնություն կազմող վերաբնակեցվածների մոտ չկա նաև գյուղի հանդեպ տիրոջ պատասխանատու ու սրտացավ վերաբերմունք, տարիներ շարունակ ոչինչ չեն տեսել,-հարկահավաքման ցածր մակարդակից խոսելով՝ ասում է Վարդանյանը: Գյուղի հիմնական խնդիրը ճանապարհներն են ու խմելու ջրագծի ներքին ցանցի նորացումը: Միայն սեփական բյուջեով հնարավոր չէ այն լուծել: Ծրագրել են այս տարի կարգավորել նաև լուսավորությունը: Վարդանյանը պատրաստ է վճարած հարկերով արված աշխատանքների մասին ամենամսյա հաշվետվություն տալ: Նաև կարծիք է հայտնում, որ ստորագրահավաքը վարչական ղեկավարն է նախաձեռնել: Եթե ուզում են դուրս գալ՝ իրենց գործն է: Կա կառավարության որոշում, որը փոխել հնարավոր չէ:
Տեսանյութը պատրաստվել է “Պահանջատեր համայնք, հաշվետու իշխանություն” ծրագրի շրջանակներում, որն իրականացվում է ՀՀ-ում ԱՄՆ դեսպանատան Փոքր դրամաշնորհների հանձնաժողովի տրամադրած դրամաշնորհի շրջանակներում: Տեսանյութում հնչած կարծիքները հեղինակներինն, են և կարող են չհամընկնել հանձնաժողովի կարծիքների հետ:
0 Մեկնաբանություն